Էդգար Դեգայի նամակը Կամիլ Պիսարոյին


1880
Իմ թանկագին Պիսարո,
Ողջունում եմ ձեր եռանդը. ձեր փաթեթով վազեցի օրիորդ Կեսսետի մոտ: Նա այդ առիթով նույնպես շնորհավորում է:


Ահա նմուշները. ընդհանուր երանգը սևավուն է, ավելի շուտ մոխրավուն՝ ցինկի շնորհիվ, որն ինքնին յուղոտ է և պահպանում է տպագրական սև ներկը. թիթեղն այնքան էլ ողորկ չէ: Կռահում եմ, որ Պոնտուազում ձեզ համար դա այնքան հեշտ չէ, որքան Յուշետ փողոցում: Բայց և այնպես, հարկ կլիներ ունենալ ավելի հարթ ինչ-որ բան:
Դուք կարող եք տեսնել, այնուամենայնիվ, որքան հնարավորություններ է տալիս այդ միջոցը: Հարկ կլիներ նաև, որ դուք վարժվեիք հատիկներ դնել՝ ստանալու համար, ասենք, միերանգ, հավասար և նուրբ մոխրագույնով երկինք: Դա շատ դժվար է, եթե հավատանք Մեթր Բրաքմոնին: Լոկ օրիգինալ արվեստից փորագրանկարներ անելիս է դա երևի բավական դյուրին:
Ահա միջոցը: Վերցրեք լավ ողորկ թիթեղ (դա էական է, հասկանում եք): Ամբողջովին յուղազերծեք կավճով: Նախօրոք շատ գերհագեցած սպիրտի մեջ լուծեք խեժը: Լուսանկարիչների նման, երբ կոլոդիումը ածում են իրենց ապակու վրա, լցրեք հեղուկը (չմոռանաք նրանց պես հոսեցնել լուծույթը թիթեղից՝ այն թեքելով). այսպիսով, հեղուկը գոլորշիանում է և թիթեղի վրա թողնում մանրահատիկ խեժի քիչ թե շատ հաստ շերտ: Խածագծելով, դուք ունենում եք այնքանով մուգ ցան, որքանով ավել կամ պակաս կթողնեք խածատվելու: Հավասար երանգներ ստանալու համար դա անհրաժեշտ է. ավելի անկանոն էֆեկտներ կարող եք ստանալ ստվերագծմամբ կամ մատով, կամ ցանկացած այլ սեղմումով փափուկ լաքը ծածկող թղթի վրա:
Ձեր փափուկ լաքը ինձ թվում է չափազանց յուղոտ: Չափից շատ յուղ կամ ճարպ եք դրել:
Ինչո՞վ եք սևացրել ձեր լաքը, որպեսզի ստանաք գծանկարի ետին այդ մուգ տոնը: Այն շատ գեղեցիկ է:
Փորձեք ավելի մեծ ինչ-որ բան անել ավելի լավ տախտակով:
Ինչ վերաբերում է գույնին, ձեր հաջորդ ուղարկածը տպել կտամ գունավոր թանաքով: Նաև այլ գաղափարներ ունեմ գունավոր տախտակների վերաբերյալ:
Ուստի փորձեք անել ավելի ավարտուն մի բան: Հիանալի կլիներ տեսնել կաղամբների շարունակվող ուրվագծերը: Մտածեք, որ ձեզ պետք է ասպարեզ մտնել մեկ կամ երկու շատ-շատ գեղեցիկ տախտակով:
Իմ հերթին, օրերս կզբաղվեմ դրանով:
Լսել եմ, թե Կայբոտն իր պատուհաններից «Օսման բուլվարի պատսպարաններն» է անում:
Կարո՞ղ եք Պոնտուազում գտնել մեկին, ով կարողանա շատ թեթև պղնձի վրա հատել այն, ինչ արտապատկերել եք:
Կարելի կլիներ գծային արտատիպերի վրա որոշակի էֆեկտով այդ տեսակ կաղապարներ կիրառել օֆորտի կամ փափուկ լաքի համար և այդպիսով ջրանկարված ծակոտկեն փայտի միջոցով տպել բաց մնացած հատվածները: Այդպես կարելի կլիներ ինքնատիպ ու հետաքրքիր գույներով գեղեցիկ դրոշմանկարներ անել: Աշխատեք այդ ուղղությամբ, եթե կարող եք: - Ես ձեզ շուտով կուղարկեմ այս ժանրի իմ նմուշները: - Դա կլիներ խնայողական ու նոր բան: Ես կարծում եմ, այն մեզ բավական է սկսելու համար:
Կարիք չկա գովելու ձեր բանջարանոցների գեղարվեստական որակը:
Միայն թե հենց զգաք, որ մի քիչ վարժվել եք, փորձեք ավելի մեծ ու ավելի ավարտուն բաներ անել:
Համարձակ եղեք:

Դեգա

Թարգմանությունը ֆրանսերենից՝ Արա Խաչիկօղլյան
Աղբյուրը՝ Էդգար Դեգա, Նամակներ, Սարգիս Խաչենց. ՓՐԻՆԹԻՆՖՈ, Երևան, 2009

Էդգար Դեգայի նամակը Կամիլ Պիսարոյին Էդգար Դեգայի նամակը Կամիլ Պիսարոյին Reviewed by ՏԱՐԸՆԹԵՐՑՈՒՄ on марта 21, 2017 Rating: 5
Технологии Blogger.