«Դպրոցների բարձր դասարանների աշակերտների և զբոսաշրջիկների այցերը նվազել են». Ավետիք Իսահակյանի տուն-թանգարանի տնօրեն

Երևանի Ավետիք Իսահակյանի տուն-թանգարանը 2017-ին պետությունից ստացել է 25 միլիոն 297 հազար դրամ սուբսիդիա: Արտաբյուջեն պլանավորել է 2 միլիոն 180 հազար դրամ, 2016-ի համեմատ գերակատարել է 37%-ով: 2017-ին Թանգարանն ունեցել է 8738 այցելու՝ նախորդ տարվա 7203-ի համեմատ: Այդուհանդերձ, այցելուների հետաքրքրությունը Վարպետի տուն-թանգարանի հանդեպ բավարար չեն համարում, ինչպես նախարար Ամիրյանն, այնպես էլ Թանգարանի տնօրեն Անժելա Խորենյանը: Վերջինը դժգոհել է, որ այցելուների ցանկում նվազել է դպրոցների բարձր դասարանների աշակերտների թիվը՝ պայմանավորված ավագ դպրոցի ծրագրային ու այլ առանձնահատկություններով.

«Մեծ չէ նաև արտասահմանցի զբոսաշրջիկների հոսքը, քանի որ Իսահակյանին դրսում չեն ճանաչում»,- նկատել է Թանգարանի մեկ այլ աշխատակից:

Ավետիք Իսահակյանին ու նրա ժառանգությունը ճանաչելի դարձնելն, ըստ նախարարի, հենց Թանգարանի առաջնային գործառույթներից է: Արմեն Ամիրյանի բնորոշմամբ՝ Վարպետի թանգարանը «ռեբրենդավորման» կարիք ունի: Պայմանավորվել են՝ խնդիրները տեղում հասկանալու և լուծումներ գտնելու համար նախարարը շաբաթվա ընթացքում կայցելի թանգարան, իսկ մինչ այդ թանգարանի կոլեկտիվը կձևավորի նախարարին ներկայացվելիք առաջարկությունների փաթեթը:

Խաչատուր Աբովյանի տուն-թանգարանը 2017-ին պետությունից ստացել է 29 միլիոն 500 հազար սուբսիդիա: Պլանավորած 4 միլիոն 90 հազար արտաբյուջեն գերակատարել է 1700 դրամով: Բավական համեստ է եղել այցելուների թիվը՝ 1100 մարդ:

Պատկերը տխուր է հատկապես պետության ծախսը մեկ այցելուի վրա՝ նախարարության որդեգրած հաշվարկի նոր ձևաչափով: Ըստ այդ ձևաչափի, Խաչատուր Աբովյանի տուն-թանգարանի յուրաքանչյուր այցելուի վրա պետությունը ծախսում է 26 800 դրամ: Սոցիալական ու առողջապահական բազմաթիվ խնդիրներ ունեցող երկրում նախարարն այս թիվը պարզապես անընդունելի է համարում:

«Իր պատմության ամբողջ ընթացքում Աբովյանի տուն-թանգարանը նման ցուցանիշ չի ունեցել: Նախկինում այցելուների թիվը շատ ավելի համեստ է եղել»,- ասել է տնօրեն Վահրամ Քոսակյանը:

«Անցած պատմությունն ինձ չի հետաքրքրում: Ակնկալում եմ նո՛ր պատմություն»,- հակադարձել է նախարարը՝ պահանջելով 2018-ին ապահովել առնվազն 5000 այցելու:

Տնօրենի՝ դա անհնար է, պատասխանին մեկ անգամ ևս հակադարձեց. «Ի՞նչ ենք անում, որպեսզի թանգարանը դարձնենք ավելի հետաքրքիր: Ի՞նչ ենք անում, որպեսզի մարդիկ իմանան թանգարանի մասին: Եթե կարողանաք գտնել այս երկու հարցի պատասխանները, 5000 այցելուի հարցն ինքնըստինքյան կլուծվի»:

Տարեկան հաշվետվությամբ նախարարությունում էին նաև Եղիշե Չարենցի տուն-թանգարանի ներկայացուցիչները:

Թանգարանը 2017-ին ստացել է շուրջ 15 միլիոն 800 հազար դրամ սուբսիդիա: Պլանավորած 5 միլիոն 200 հազար արտաբյուջեն կատարել է չորս միլիոն 41 հազար դրամով: 2016-ի համեմատ աճ է արձանագրել՝ 20%-ով: 2017-ին Չարենցի տուն-թանգարանն ունեցել է 10 235 այցելու: Թանգարանի համար 2019-ը հոբելյանական է. պատրաստվում են հիմնադրման 55-ամյակին: Ցանկանում են նշել մեծ շուքով, թանգարանի պատմությանը նվիրված ֆիլմ նկարել:

Նախարարն առաջարկել է ֆիլմում ներկայացնել ոչ թե թանգարանի պատմությունն, այլ ֆիլմի միջոցով ներկայացնել Չարենցին՝ նրա կենսագրական ուշագրավ դրվագներով ու ստեղծագործական հարուստ ժառանգությամբ: Տնօրեն Անահիտ Ասատրյանին առաջարկեց նաև ուսումնասիրել ու հավաքել չարենցյան բանաստեղծությունների հիման վրա գրված երաժշտական ստեղծագործությունները՝ դրանք մեկ հավաքածուուով ներկայացնելու նպատակով, տեղեկացնում է Մշակույթի նախարարությունը: