Կատուները մլավեցին.
«Էլ չենք ուզում մլավել:
Մենք ուզում ենք խոզերի պես խռխռալ»:
Բադիկները վրա բերին.
«Էլ չենք ուզում կռնչալ:
Մենք ուզում ենք գորտերի պես կռկռալ»:
Խոճկորները մլավեցին՝
Մյաո˜ւ, մյաո˜ւ:
Կատուները խռխռացին՝
Խը˜ռ, խը˜ռ, խը˜ռ:
Սագիկները կռկռացին՝
Ղո˜րտ, ղո˜րտ, ղո˜րտ:
Հավիկները կռավեցին՝
Ղա˜, ղա˜, ղա˜:
Ճնճղուկը թռավ եկավ
Հորթուկի պես բառաչեց՝
Մու-ու-ո˜ւ:
Արջը եկավ օրորվելով
Ու սկսեց մռնչալ՝
Ծուղ-րու-ղո˜ւ:
Կկուն նստեց ծառի ճյուղին.
«Չեմ կամենում կվկվալ,
Պիտի հաչեմ գամփռի պես.
Հա՛ֆ-հա՛ֆ-հա՛ֆ»:
Նապաստակն էր միայն խելոք.
Չէր մլավում,
Չէր կռավում,
Տապ էր արել
Կաղամբի տակ,
Բլբլում էր իրենց լեզվով
Ու համոզում գազաններին անխոհեմ.
«Ով որ պիտի ծլվլա,
Թող չմլավի:
Ով որ պիտի մլավի,
Թող չծլվլա:
Ագռավը կով չի դառնալու,
Իսկ գորտերն էլ
Չեն ճախրելու ամպերի մեջ»:
Հավքերը և գազանները,
Թռչողներն ու վազանները
Աղմկում են ու խենթանում,
Լսել անգամ չեն ցանկանում:
Զբոսնում են ձկները հանդում,
Թևածում են գորտերն ամպում:
Մկնիկները բազմաթիվ
Կալանել են ջոջ կատվին:
Աղվեսները՝ համա˜կ նազեր,
Լուցկի առել,
Ծով են վազել,
Հրդեհել են ծովը կապույտ:
Ծովն է այրվում բոցերի մեջ,
Լաց են լինում կետերը խեղճ.
«Հե˜յ, հրշեջնե˜ր, շտապեցե˜ք,
Մեզ փրկեցե˜ք, մեզ փրկեցե˜ք»:
Ցատկոտելով գորտերն եկան,
Ջուր ցանեցին երեք անգամ:
Հանգցնում են՝ չի հանգչում,
Մարում են, բայց չի մարում:
Թռավ թիթեռը նրբաթև,
Թևով արեց թեթև, թեթև,
Կրակն իջավ, մարմրեց
Ու մարեց լրիվ:
Բոլորն ահա ուրախացան,
Ծիծաղեցի˜ն, զվարթացա˜ն,
Ծափ տվեցին ականջներով
Ու դոփեցին սմբակներով:
Սագերն էլի սագավարի
Ճղճղացին՝ ղա˜-ղա˜-ղա˜:
Կատուները մլավեցին՝
Մյաո˜ւ-մյաո˜ւ:
Ծիտիկները ծլվլացին՝
Ծի˜վ-ծի˜վ-ծի˜վ:
Նժույգները խրխնջացին՝
Ի-ի-ո-հո-հո˜:
Բզեզները տզտզացին՝
Տը˜զ-տը˜զ-տը˜զ:
Խոճկորները խռխռում են՝
Խը˜ռ-խը˜ռ-խը˜ռ:
Հավիկները կռթկռթում են՝
Կո˜-կո˜-կո˜:
Նանիկ են ասում իմ անուշիկի˜ն,
Իմ աննմանի˜ն, իմ պուպուշիկի˜ն:
Թարգմանությունը՝ Յուրի Սահակյան
Տես նաև Չուկովսկի Հեքիաթներ
Կորնեյ Չուկովսկի | Խառնաշփոթ 
Reviewed by ՏԱՐԸՆԹԵՐՑՈՒՄ on августа 25, 2019 Rating:
Reviewed by ՏԱՐԸՆԹԵՐՑՈՒՄ on августа 25, 2019 Rating:
