Ջոն Սթեյնբեք | Մեր հոգսերի ձմեռը | համառոտ

Ապրիլյան ոսկե մի առավոտ Իտեն Ալեն Հոուլին զարթնում է Նյու Բեյթաուն քաղաքի իր տոհմական կալվածքում: Ունի սիրելի կին և 2 փոքրիկներ: Սակայն դրամի հարցը ծանր է: Մի ժամանակ հարուստ ընտանիքի հետնորդը, Հարվարդի համալսարանի շրջանավարտը աշխատում է հիմա կրպակում, սիցիլիացի Ալֆիո Մարուլոյի մոտ: Աշխատավարձը հազիվ է հերիքում: Կնոջ՝ Մերիի համեստ ժառանգությունը թողել են սև օրվան: Ազնիվ եղանակով հարստանալու հնար չկա: Չարչարանաց ուրբաթն է: Իտենը այդ օրը մտածում է անտանելի միայնակության մասին: Իր աշխատակցի հետ զրուցում են բանկերի թալանի մասին:

Ցերեկը խանութ է գալիս Բիգերս անունով կոմիվայաժորը, որն առաջարկում է Իտենին մթերքները պատվիրել իր ֆիրմայում զեղչով: Զեղչի գումարը կմնա Իտենին: Իտենը հրաժարվում է: Աշխատակից Ջոյը սկսում է համոզել Իտենին համաձայնել այդ առաջարկին: Նույն օրը Մերիին գուշակություն են հայտնում, իբր իր ամուսինը՝ Իտենը, հարստանալու է և դառնալու է քաղաքի կարևոր մարդկանցից:

Իտենը սկսում է զգալ, որ իր ներսում տեղի է ունենում փոփոխություն: Կիրակի օրը՝ եկեղեցուց հետո, Իտենը և Մերին գնում են Բեյքերներին հյուր, որտեղ նրանց պատմում են, որ քաղաքում օդանավակայան է կառուցվելու: Միակ հարմար տեղը երբեմնի հարուստ, իսկ հիմա աղքատացած և հարբեցողության տրված Դենի Թեյլորի հողամասն է, որը սա համառորեն չի ուզում վաճառել: Այդ օդանավակայանի շինարարության մեջ է Բեյքերը համոզում Իտենին ներդնել Մերիի ժառանգության գումարը: Իտենը հասկանում է, որ քաղաքին սպասում են փոփոխություններ, իշխանության են գալու նոր մարդիկ:

Երեկոյան Իտենը գնում է հարբեցող Դենի Թեյլորի մոտ և նրան պարտքով գումար է տալիս, որպեսզի սա բուժվի ալկոհոլիզմից: Բուժումն արժե 1000 դոլար: Դենին կասկած է հայտնում, որ այդ գումարը նրան են տալիս մեծ քանակությամբ վիսկիով սպանելու և իր հողամասին տիրանալու համար: Իտենը հավատացնում է, որ ցանկանում է միայն օգնել Դենիին: Տանը խնդրում է Մերիին բանկից հանել գումարը, սակայն նպատակը թաքցնում է:

Աշխատակից Ջոյը Իտենին ասում է, որ իրենց շեֆը ամենայն հավանականությամբ Նահանգներում գտնվում է ոչ օրինականորեն: Կրպակում աշխատելիս Իտենը երգում է Շեքսպիրի տողը. «Մեր հոգսերի ձմեռն անցյալում է…»:

Դենի Թեյլորը անհետանում է քաղաքից: Կրպակ է գալիս դաշնային գործակալը, որը սկսում է հարցեր տալ Մարուլոյի մասին:

Մոտենում է Հուլիսի չորսը՝ Անկախության օրը: Իտենը գիտի, որ Բեյքերը տոներին մեկնում է քաղաքից: Ջոյի կարծիքով բանկն արժե թալանել մեծ տոների նախօրյակին: Հունիսի 30-ին Իտենը բանկից վերցնում է մնացած գումարը:

Հունիսի 2-ին Իտենը դուրս է գալիս տանից՝ վերցնելով տան թալիսմանը: Դա փոքրիկ քար է: Երբ նա մոտենում է կրպակին, լսում է մեքենայի ձայնը: Նրա նախագիծը խափանվում է: Եկել է չինովնիկ, որը Մարուլոյից փաստաթղթեր է բերել: Մարուլոն ուզում է Իտենին փոխանցել կրպակը: Ինքը Մարուլոն արտաքսված է երկրից: Իտենը միակն էր, որ երբեք նրան չէր խաբել այս երկրում: Իտենը մոռանում է բանկ թալանելու իր մտադրության մասին:

Հուլիսի հինգին իր կալվածքի նկուղում գտնում են մեռած Դենի Թեյլորին: Իտենը գնում է Բեյքերի մոտ և ցույց է տալիս 1000 դոլարի դիմաց Դենի Թեյլորի իրեն տված պարտամուրհակները և պահանջում է օդանավակայանի շինարարությունից եկամտի մեծ մասը:

Նյու Բեյթաունում սկսվում են ստուգումներ: Լուրեր են պտտվում, որ նոր քաղաքապետ է նշանակվելու Իտենը:

Տանը նշում են Իտենի որդու դպրոցական շարադրության հաղթանակը միջդպրոցական մրցույթում, և Իտենը կենաց ասելիս արտասանում է. «Մեր հոգսերի ձմեռը անցյալում է…»:

Երեկոյան Իտենի տուն է գալիս մի մարդ Նյու Յորքից: Պարզվում է, Ալենի դպրոցական շարադրությունը ինքնուրույն չէ և կազմված է ամերիկյան գրողների հայտնի ասույթներից: Նա չի կարող ստանալ մրցանակը: Իտենը հասկանում է, որ մատնիչը նրա դուստր Էլենն է: Դուրս է գալիս տանից՝ գրպանը դնելով ածելիների փաթեթը: Էլենը փորձում է կանգնեցնել նրան, բայց նա խոստանում է վերադառնալ: Մոտենում է ծովին և ջուրը մտնում: Տեսնում է, ինչպես է մակընթացության բարձրացող ջուրը ծածկում հորիզոնի լույսերը: Մարդկանց լույսերն էլ այդպես մարում են: Նրա լույսը ևս հիմա կմարի: Նա տանում է ձեռքը գրպանը և ուզում է հանել այնտեղից ածելին: Սակայն գտնում է թալիսմանը: Իտենը դուրս է գալիս ջրից: Նա պիտի հանձնի թալիսմանը Էլենին: Որպեսզի չհանգչի ևս մեկ լույս:

Տես նաև Թեոդոր Դրայզեր Քույր Քերրի, Ջեք Լոնդոն Մարտին Իդեն և Ֆրենսիս Սքոտ Ֆիցջերալդ Գիշերն անույշ է